آئی سی ایس ایف نے اسلام آباد میں شیئرڈ فیوچر بازارکا افتتاح کر دیا

اسلام آباد( گوادر پرو )چین پاکستان تھنک ٹینکس، انسٹی ٹیوٹ فار اے کمیونٹی ود شیئرڈ فیوچر (آئی سی ایس ایف) اور پاکستان ریسرچ سینٹر فار اے کمیونٹی ود شیئرڈ فیوچر (پی آر سی سی ایس ایف) نے اسلام آباد میں 'شیئرڈ فیوچر بازار' کا افتتاح کردیا۔
چین اور وسطی ایشیا کے ساتھ اجناس کے ذریعے روابط کو فروغ دینے کے لئے ڈیزائن کی گئی یہ منفرد مارکیٹ نہ صرف پاکستان میں چین اور وسطی ایشیائی ممالک سے درآمد شدہ اشیاء کی خوردہ فروخت کرے گی بلکہ چین اور وسطی ایشیائی خطوں کو پاکستانی مصنوعات برآمد کرنے کے لئے ایک پلیٹ فارم بھی فراہم کرے گی۔
  آئی سی ایس ایف کا چینی وفد افتتاحی مقام پر پی آر سی سی ایس ایف کے ارکان کے ساتھ شامل ہوا۔ گوادر پرو سے گفتگو کرتے ہوئے پی آر سی سی ایس ایف کے ایگزیکٹو ڈائریکٹر خالد تیمور اکرم نے کہا کہ اربوں روپے کے اس منصوبے میں چینی اور وسطی ایشیائی سرمایہ کاروں کو اپنی مصنوعات کی نمائش کے لیے خصوصی طور پر جگہ مختص کی جائے گی۔

 انہوں نے اس بات پر زور دیا کہ مشترکہ مستقبل کی مارکیٹ کا مقصد صرف چینی مصنوعات کو متعارف کرانا نہیں ہے بلکہ وسطی ایشیائی ممالک کو چین اور پاکستان کے ساتھ جوڑنا بھی ہے۔
30 فیصد کام پہلے ہی مکمل ہو چکا ہے اور باقی تعمیراتی کام اگلے دو سالوں میں مکمل ہونے کی توقع ہے۔ اسلام آباد کے سب سے بڑے مالز میں سے ایک کی تین منزلیں اس تجارتی راہداری کے لیے مختص کی جائیں گی۔
 کمیونیکیشن یونیورسٹی آف چائنا (سی یو سی) میں آئی سی ایس ایف کے ڈین پروفیسر لی ہوائی لیانگ نے تقریب کے دوران کہا کہ یہ منصوبہ سی پیک روٹ سے فائدہ اٹھائے گا۔ انہوں نے قدیم شاہراہ ریشم کے ذریعے تجارت کی تاریخی اہمیت اور اس روٹ کی سی پیک میں جدید تبدیلی کے درمیان مماثلت پیش کی۔

  انہوں نے کہا کہ مشترکہ مستقبل کی مارکیٹ چینی اور پاکستانی برادریوں کے درمیان دوطرفہ تعلقات کو تقویت دے گی۔
اسی سلسلے میں سی یو سی کے چینی وفد نے اسلام آباد میں پی آر سی سی ایس ایف ہیڈ کوارٹرز میں 'سوشل میڈیا سیل' کا افتتاح بھی کیا۔ یہ میڈیا سیل چینی خبروں کو انگریزی میں پھیلائے گا جس کا مقصد سی پیک اور پاکستان میں چینی سرمایہ کاری کے بارے میں غلط فہمیوں کو دور کرنا اور ان کی اصلاح کرنا ہے۔