پاکستان میں چینی ایف ڈی آئی 347.6 ملین ڈالر تک پہنچ گئی

اسلام آباد  (گوادر پرو)   بورڈ آف انویسٹمنٹ پاکستان (BOI) کے تازہ ترین اعدادوشمار کے مطابق، پاکستان نے مالی سال 2022-23کے پہلے 10 ماہ (جولائی 2022-اپریل 2023) میں چین سے 347.6 ملین ڈالر کی براہ راست غیر ملکی سرمایہ کاری حاصل کی ہے۔ 

بی او آئی کے مطابق  اپریل کے دوران پاکستان کو چین سے مزید 28.4 ملین ڈالر موصول ہوئے، جس سے رواں مالی سال کے دوران چین کی کل  ایف ڈی آئی  347.6 ملین ڈالر تک پہنچ گئی۔ پاکستان کو مالی سال 2022-23کے پہلے دس  ماہ میں مجموعی طور پر 1170.1 ملین ڈالر موصول ہوئے ہیں، جس میں 29.7 فیصد کا بڑا حصہ چین سے آیا ہے۔

چین کے بعد جاپان 162.9 ملین ڈالر کے ساتھ پاکستان میں دوسرے نمبر پر ہے،  ا س کے بعد سوئٹزرلینڈ 131.6 ملین ڈالر کے ساتھ تیسرے، متحدہ عرب امارات 113.6 ملین ڈالر کے ساتھ چوتھے نمبر پر ہے۔

رواں مالی سال کے پہلے دس ماہ میں پاکستان نے پاور سیکٹر میں سب سے زیادہ 504.1 ملین ڈالر کی سرمایہ کاری کی۔ مالیاتی کاروبار میں ملک کو اب تک 264.5 ملین ڈالر، تیل اور گیس کے شعبے میں 128.2 ملین ڈالر، کیمیکلز میں 39.5 ملین ڈالر، تجارت میں 34.4 ملین ڈالر، ٹرانسپورٹ میں 30.5 ملین ڈالر، تعمیراتی شعبے میں 19.1 ملین ڈالر، ٹیکسٹائل میں 19.1 ملین ڈالر موصول ہو چکے ہیں۔ 13.5 ملین ڈالر، مواصلات میں 8.8 ملین ڈالر جبکہ دیگر شعبوں میں 127.2 ملین ڈالر موصول ہوئے۔

مالی سال 2021-22میں چین 531.6 ملین ڈالر کے ساتھ پاکستان میں سرفہرست سرمایہ کار تھا جو کہ دنیا کے مختلف ممالک سے پاکستان کو موصول ہونے والی کل ایف ڈی آئی کا 28.47 فیصد تھا۔