حکومت نے گوادر  ڈویلپمنٹ پیکج کا اعلان کر دیا

گوادر  (گوادر پرو)  حکومت نے ضلع گوادر   میں تعلیمی نظام، صحت کے بنیادی ڈھانچے، سڑک کے رابطوں، ماہی گیری، پانی اور بجلی کو بہتر بنانے کے لیے ''ترقیاتی منصوبے کے پیکیج''  کا اعلان کر دیا۔

ضلع  گوادر کے ترقیاتی پیکج کے تحت طلباء کے لیے کلاس رومز کی تعمیر اور مرمت کے لیے 700 ملین روپے مختص کیے گئے ہیں۔ پشکان میں  بوائز انٹرمیڈیا کالج کی تعمیر کے لیے 10 ملین اور روپے،کثیر المقاصد ہالز اور لائبریریوں کی تعمیر کے لیے 140 ملین روپے رکھے گئے ہیں۔

گوادر کے صحت کی دیکھ بھال کے نظام میں بنیادی صحت کے یونٹس (BHUs) اور علاقائی مراکز صحت کو بہتر بنانے کے لیے حکومت نے  365 ملین روپے رکھے ہیں۔ پینے کا پانی دستیاب کرنے، پانی کی لائنوں، واٹر سپلائی سکیموں اور پانی کی ٹینکیوں کے لیے 380 ملین روپے مختص کیے گئے ہیں۔ اس کے علاوہ  نئے کھیل کے میدانوں کی تعمیر اور ان کی دیکھ بھال کے لیے 75 ملین روپے مختص کیے گئے ہیں۔

فشریز سیٹ اپ کو اپ گریڈ کرنے کے لیے حکومت اورماڑہ اور جیونی میں دو فش ہاربرز تیار کر رہی ہے۔ سڑک کے بنیادی ڈھانچے کو بہتر بنانے کی مد میں مکران کوسٹل ہائی وے سے گوادر کے متعدد دیہات تک منسلک سڑکوں کی تعمیر کے لیے 900 ملین روپے رکھے گئے ہیں۔ دریں اثنا ایم 8 سے دیہات تک  سڑکوں  کو جوڑنے کے لیے 700 ملین روپے رکھے گئے ہیں۔
 

حکومت نے کوسٹل ہائی وے اور کنڈا سول کے درمیان سڑک کے لیے 155 ملین روپے اور ڈگرو ناگور اور آدم بازار کے درمیان سڑک کے لیے 75 ملین    روپے بھی  مختص کیے ہیں۔ 
 
قانون ساز میر حمل کلمتی نے کہا کہ حکومت  صرف گوادر شہر کے لیے 250 ملین  روپے خرچ کر رہی ہے۔ انہوں نے یہ بھی دعویٰ کیا کہ حکومت  اقلیتوں  پر بھی خرچ کر رہی ہے۔ ہندو برادری کی امنگوں کو پورا کرنے کے لیے باؤنڈری وال کیلئے  13 ملین روپے مختص کیے گئے ہیں۔ انہوں نے کہا کہ جی ڈی اے یکم نومبر کو گوادر کے اسپتال کو انڈس اسپتال کے حوالے کرنے کے لیے تیار ہے۔