پاکستان رواں سال پیلس میوزیم میں گندھارا نمائش کرۓ گا،پاکستانی سفیر

بیجنگ(چائنا اکنامک نیٹ)امید ہے کہ ہم اس سال پیلس میوزیم میں پاکستان کے گندھاراپر ایک انتہائی اہم نمائش کا آغاز کریں گے۔ان خیالات کا اظہارچین میں پاکستانی سفیر معین الحق نےچائنہ اکنامک نیٹ کو ایک خصوصی انٹرویو میں کیا۔
 
سیاحت اور ثقافتی صنعتوں میں چین پاکستان تعاون کی بڑی صلاحیت پر زور دیتے ہوئے، سفیر نے سی ای این کو بتایا کہ دونوں ممالک کے درمیان سرگرمیوں کی ایک فہرست کا اشتراک کیا گیا ہے، انہوں نے مزید کہا کہ ان تقریبات میں [ثقافتی] نمائشیں اورٹور آپریٹرز کے ذریعے  چین کے دورے شامل ہوں گے۔ 
 
چین اور پاکستان کے درمیان فروری کے مشترکہ بیان میں گندھارا آرٹ کی نمائش کا ذکر بھی کیا گیا ہے۔ بیان کے مطابق،  فریقین دونوں ممالک کے ورثے اور نوادرات کے تحفظ اور پیش کش کے لیے تعاون کو مزید وسعت دیں گے۔
 
حالیہ برسوں میں چین اور پاکستان نے سیاحت اور ثقافتی صنعتوں میں تعاون کو بڑھایا ہے۔ مثال کے طور پر، دو پاکستانی اینی میٹڈ فلمیں گزشتہ سال چینی سینما گھروں میں آئیں، جس میں دی ڈونکی کنگ چین میں بہترین کارکردگی دکھانے والی پاکستانی فلم بن گئی۔ اسی سال دوطرفہ سیاحتی تبادلوں کو مزید فروغ دینے کے لیے سیاحتی تعاون پر ایک مفاہمت نامے پر دستخط کیے گئے۔