پاکستان کی آئی سی ٹی برآمدات میں اضافہ جاری رہے گا، ماہرین

لاہور (گوادر پرو) پاکستان کی آئی سی ٹی برآمدات میں اگلے چند سالوں میں 30 فیصد اضافہ ہو سکتا ہے، ہم تربیت یافتہ انسانی وسائل، یونیورسٹیوں میں آئی سی ٹی منصوبوں کے لیے انفراسٹرکچر، ٹیکس مراعات کے لحاظ سے صنعت کو سپورٹ کریں اور  سی پیک  فریم ورک کے تحت آئی سی ٹی تعاون کے مواقع سے بھرپور فائدہ اٹھائیں۔ یہ بات یونیورسٹی آف انجینئرنگ اینڈ ٹیکنالوجی (UET) کے  الخوارزمی انسٹی ٹیوٹ آف کمپیوٹر سائنس (KICS) کے  ڈائریکٹر پروفیسر ڈاکٹر وقار محمود نے گوادر پرو  کو  ایک حالیہ انٹرویو میں  بتائی۔

پاکستان بیوروآف   شماریات  کے مطابق  مالی سال-22 2021  کے پہلے 11 مہینوں کے دوران پاکستان کی ٹیلی کمیونیکیشن، کمپیوٹر اور انفارمیشن سروسز کی برآمدات 25.45 فیصد کی شرح نمو کے ساتھ 2.381 بلین ڈالر تک بڑھ گئیں جو کہ گزشتہ مالی سال کی اسی مدت کے دوران 1.898 بلین ڈالر کے مقابلے میں تھیں۔ 

  پروفیسر ایمریٹس آف فیکلٹی آف الیکٹریکل، الیکٹرانکس، اور کمپیوٹر انجینئرنگ، اور مہران یونیورسٹی آف انجینئرنگ اینڈ ٹیکنالوجی (MUET) جامشورو ک  پروفیسر ڈاکٹر بی ایس چوہدری کا   خیال ہے کہ  کووڈ 19  کی وجہ سے پیدا ہونے والی رکاوٹ نے پاکستان کی آئی سی ٹی برآمدات کے لیے ایک منفرد موقع فراہم کیا۔ حکومتی سبسڈیز اور پاکستان کی مجموعی لیبر لاگت کا فائدہ پوری دنیا سے صارفین کو راغب کرتا ہے۔

پاکستان اکنامک سروے22 2021-  کے مطابق جولائی تا فروری مالی سال   2022 کے دوران ٹیلی کام سیکٹر میں سرمایہ کاری ( ایف ڈی آئی  اور مقامی)  930.1 ملین ڈالر سے تجاوز کر گئی۔ جولائی تا مارچ مالی سال 2022 کے دوران ٹیلی کام سیکٹر نے  ٹیکسز، ریگولیٹری فیس، ابتدائی اور سالانہ لائسنس فیس، ایکٹیویشن ٹیکس، اور دیگر ٹیکسوں کی مد میں قومی خزانے کو 163.3 بلین (تخمینہ) روپے کا حصہ ڈالا۔

آئی سی ٹی کی ترقی کے لیے اچھا انفراسٹرکچر اور اچھی تربیت یافتہ افرادی قوت ضروری ہے۔ پروفیسر ڈاکٹر وقار نے وضاحت کی کہ پاکستان میں 44 ملین براڈ بینڈ صارفین اور 100 ملین سے زیادہ موبائل صارفین ہیں، جس سے ظاہر ہے کہ عام لوگوں کو کچھ آئی سی ٹی خدمات تک رسائی حاصل ہے۔ ہر سال 25,000 سے زائد گریجویٹ صنعت میں داخل ہوتے ہیں اور 600,000 سے زائد افراد صنعت کے تمام پہلوؤں میں ملازمت کرتے ہیں۔

پروفیسر ڈاکٹر وقار نے مزید کہا  بڑے شہروں کے علاوہ  پاکستان کو دوسرے دور دراز شہروں میں بھی مواقع تلاش کرنے کی ضرورت ہے جہاں نوجوان فری لانس کے طور پر کام کر سکیں اور دیگر آؤٹ سورس خدمات فراہم کر سکیں۔ حکومت کی جدید خدمات اور ٹول ٹریننگ کی مدد سے وہ  آئی سی ٹی کی مجموعی مصنوعات کی برآمد میں حصہ لے سکتے ہیں۔   

وزیر خزانہ اور محصولات  ڈاکٹر مفتاح اسماعیل نے وفاقی بجٹ-23 2022 کی تقریر میں اعلان کیا کہ حکومت نے آئی ٹی سیکٹر میں تربیت فراہم کرنے، نوجوانوں کو لیپ ٹاپ فراہم کرنے، نیٹ ورک کو بہتر بنانے اور آئی ٹی ایکسپورٹ کو فروغ دینے کے لیے 17 ارب روپے مختص کیے ہیں۔ دونوں ماہرین نے اتفاق کیا کہ یہ حوصلہ افزا اقدام درست سمت میں ہے۔  سی پیک  کی طرف سے فراہم کردہ ترقیاتی تعاون کے ساتھ مل کر، پاکستان کی آئی سی ٹی  صنعت مستحکم رفتار سے ترقی کرتی رہے گی۔

چین اور پاکستان نے زراعت، ٹرانسپورٹیشن، تعلیم اور صحت سمیت مختلف شعبوں میں وسیع تعاون کیا ہے اور پاکستان کا جاری آئی سی ٹی اس کے لیے بھرپور تعاون فراہم کرتا ہے۔ آئی سی ٹی اور ڈیجیٹل معیشت میں چین اور پاکستان کے درمیان ہمہ گیر تعاون کو بڑھانا اہم ہے۔ 2007 میں یو ای ٹی پاکستان میں یونیسکو ہائر ایجوکیشن انوویشن سینٹر کے پروگرام کے لیے سدرن یونیورسٹی آف سائنس اینڈ ٹیکنالوجی کا پارٹنر بن گیا۔ اس تعاون کے فریم ورک کے اندر بہت سی پیشرفت کی گئی ہے، بشمول سمارٹ کلاس رومز، جہاں آن لائن تعلیم نے  کووڈ 19 کے دور میں اہم کردار ادا کیا ہے۔ پروفیسر ڈاکٹر وقار نے چین اور پاکستان کے درمیان تعاون کے ساتھ مزید ڈیجیٹل تبدیلی کے مراکز قائم کرنے کی سفارش کی۔

انفارمیشن ٹیکنالوجی (آئی ٹی) اور ڈیجیٹل اکانومی کی مشاورتی کونسل نے حال ہی میں کہا کہ چینی مارکیٹ میں حتمی طور پر داخلے کے لیے مقامی آئی ٹی کمپنیوں کو  سی پیک میں شرکت کے لیے حوصلہ افزائی  کی ضرورت ہے۔ پروفیسر ڈاکٹر بی ایس چوہدری نے  سی پیک  میں پاکستانی اسٹارٹ اپس کو شامل کرنے کی ضرورت کی تصدیق کی۔ انہوں نے مزید کہا کہ امید افزا پاکستانی ٹیکنالوجی کمپنیوں میں وینچر کیپیٹل آئی سی ٹی انڈسٹری کی ترقی میں معاونت کا ایک اہم طریقہ ہے۔