چین بدستور پاکستان کی برآمدات کی دوسری بڑی منڈی ہے ، چائنا امپورٹ ڈویلپمنٹ رپورٹ
بیجنگ: چین بدستور پاکستان کی برآمدات کی دوسری سب سے بڑی منڈی ہے ہے ۔بیجنگ نرمل یونیورسٹی کے سکول آف اکنامکس اینڈ بزنس ایڈمنسٹریشن اور چائنا انسٹی ٹیوٹ آف ایجوکیشن اینڈ سوشل ڈویلپمنٹ کی طرف سے مشترکہ طور پر جاری کی گئی چائنا امپورٹ ڈویلپمنٹ رپورٹ 2021 کے مطابق پاکستان کی برآمدات 2020 میں چین کی کل درآمدات کا 1.058 فیصد بنتی ہیں۔ چین کے درآمدی ہداف میں پاکستان 100 سرفہرست ممالک میں 68ویں نمبر پر ہے۔ سٹیٹ بینک آف پاکستان کے مطابق جولائی تا ستمبر (2021-22 ) کے دوران چین کو پاکستان کی برآمدات 69.73 فیصد بڑھ کر 559.153 ملین ڈالر ہوگئیں جو کہ گزشتہ سال کی اسی مدت میں 329.421 ملین ڈالر تھیں۔ چائنہ اکنامک نیٹ کے مطابق چین کی وزارت تجارت کے اعدادوشمار سے پتہ چلتا ہے کہ 2021 کی پہلی ششماہی میں پاکستان کی چین کو برآمدات سالانہ 83 فیصد اضافے کیساتھ 1.73 بلین ڈالر تک پہنچ گئی ہیں ۔چین میں پاکستانی سفیر معین الحق نے نشاندہی کی کہ چین کے سرکردہ ای کامرس پورٹلز اور پاکستان میں چین کے بڑھتے ہوئے اقتصادی زونز پر دوطرفہ تجارت کی مضبوط ترقی چین پاکستان آزاد تجارتی معاہدے کے دوسرے مرحلے، درآمدات کو بڑھانے کے لیے چین کی ترغیب، بشمول چائنا انٹرنیشنل امپورٹ ایکسپو پاکستان کی فعال موجودگی کی وجہ سے ہوئی ہے۔حق نے حال ہی میں ایک انٹرویو میں کہا ہمیں امید ہے کہ اس سال پاکستان کی چین کو برآمدات 3 بلین ڈالر سے تجاوز کر جائیں گی ۔ پاکستانی سفیر نے مزید کہا کہ آئندہ چوتھی چائنا انٹرنیشنل امپورٹ ایکسپو پاکستان کے لیے بہت اہم ہے اور اس سے پاک چین دوطرفہ تجارت کو فروغ ملے گا۔ انہوں نے کہا کہ پاکستان سوتی دھاگے اور کپڑا، چاو ل اور چمڑے کی مصنوعات جیسے ''فٹ بال، دنیا کی بہترین مصنوعات میں سے ایک'' برآمد کر سکتا ہے۔ دوطرفہ تجارت کو آسان بنانے کے لیے دونوں ممالک نے بہت سے اقدامات کیے ہیں۔ مثال کے طور پر، 10 نومبر سے، سرٹیفکیٹ آف اوریجن آف چائنا پاکستان فری ٹریڈ ایگریمنٹ (FTA) کے لیے چائنا کونسل فار پروموشن آف انٹرنیشنل ٹریڈ (CCPIT) کی شاخوں کے ذریعے آن لائن درخواست دی جائے گی۔ چین پاکستان آزاد تجارت کا معاہدہ نومبر 2006 میں طے پایا تھا۔ چین پاکستان آزاد تجارتی معاہدے کا دوسرا مرحلہ 2019 میں عمل میں آیا، جس نے دونوں ممالک کے درمیان تجارتی لبرلائزیشن کو بہت بہتر کیا۔
